சர்வதேச, சுதந்திரமான, நம்பகமான விசாரணை வேண்டும்

சனி ஓகஸ்ட் 29, 2015

ஈழத்தில் தமிழர்கள் இன அழிப்பை நடத்திய சிங்கள அரசு மீது சர்வதேச, சுதந்திரமான, நம்பகமான விசாரணை வேண்டுமென்று தொடர்ந்து வலியுறுத்தியும், 2014 வரை அமெரிக்காவும் இந்த விசாரணையை வழிமொழிந்து ஐ.நா.மனித உரிமை ஆணையத்தில் தீர்மானங்களைத் தாக்கல் செய்தது.

 

ஆனால், இன்றைக்கு திடீரென இலங்கைக்கு ஆதரவாக “உள்ளக விசாரணை” என்று அமெரிக்கா கூறியது கண்டனத்திற்குரியது என்று தலைவர் கலைஞர் அவர்களுடைய அறிக்கை வருமாறு.

 

இனப்படுகொலை குறித்து இலங்கை அரசே விசாரணை நடத்தும் என்ற அமெரிக்க அரசின் முடிவு குறித்து தி.மு.க. தலைவர் கருணாநிதி வெளியிட்டுள்ள கேள்வி-பதில் வடிவிலான அறிக்கையில் கூறியிருப்பதாவது:- 

 

கேள்வி:- இலங்கையில் நடைபெற்ற இனப்படுகொலைகள் குறித்து, விசாரணை நடத்தும் பொறுப்பினை, அந்தப் படுகொலைகளுக்குக் காரணமான இலங்கை அரசிடமே ஒப்படைக்கப்போவதாக அமெரிக்க அரசின் வெளியுறவுத்துறை தெரிவித்திருப்பதாகக் கூறப்படுகிறதே?. 

 

பதில்:- இதுகுறித்து, ஐக்கிய நாடுகளின் மன்றம் அமைத்த மூவர் குழுவினர் நடத்திய விசாரணையின் மூலம் இலங்கையிலே தமிழ் இனப்படுகொலை நடந்தது உண்மை என்பது வெளிப்பட்டது. 2014-ம் ஆண்டு மனித உரிமை கவுன்சிலில் அமெரிக்க அரசு கொண்டு வந்த தீர்மானம், இலங்கையில் நடைபெற்ற போர்க்குற்றங்களை விசாரிக்க சுதந்திரமான, நம்பகமான சர்வதேச விசாரணைக் குழு அமைக்கக் கோரியது. 

 

தற்போது அமெரிக்க அரசின் முடிவு, நடந்து முடிந்த தமிழ் இனப் படுகொலையை முழுமையாக மூடி மறைத்து, போர்க்குற்ற விசாரணையை இலங்கை அரசிடமே ஒப்படைக்க முயற்சி நடப்பதாகத் தெரிகிறது. அண்மையில் இலங்கைக்கு வந்துள்ள தெற்கு ஆசியாவுக்கான அமெரிக்க அரசின் வெளியுறவுத்துறை துணைச் செயலாளர் இதனை வெளிப்படுத்தியிருக்கிறார் என்ற செய்தி வந்துள்ளது. இந்தச் செய்தி உண்மையாகிவிடக் கூடாதென்றே நான் விரும்புகிறேன், மாறாக, உண்மையாக இருக்குமானால், வரலாற்று நிகழ்வுகளைத் திரித்திடும் அமெரிக்க அரசின் இந்த முயற்சியை தி.மு.க.வின் சார்பில் வன்மையாகக் கண்டிக்கிறேன். இவ்வாறு கருணாநிதி கூறியுள்ளார்.