நெருங்கும் ஆஸ்திரேலிய தேர்தல்!

Saturday October 06, 2018

அடுத்த ஆண்டு ஆஸ்திரேலியாவில் நடக்கவிருக்கும் நாடாளுமன்ற தேர்தல் பல்வேறு தரப்பிலான விவாதங்களை உருவாக்கி வருகின்றது. அந்த வகையில், கடந்த ஆண்டு ஆளும் லிபரல் கட்சியால் புதிதாக உருவாக்கப்பட்ட உள்துறை அமைச்சகம், தற்போதைய எதிர்க்கட்சியான லேபர் கட்சி அடுத்ததாக ஆட்சிக்கு வரும் பட்சத்தில் அதனை  கலைக்குமா என்ற சந்தேகம் எழுந்துள்ளது. லேபர் கட்சிக்குள்ளும் இதுதொடர்பான விவாதங்கள் நடைபெறுவதாக சொல்லப்படுகின்றது.  இது சம்பந்தமான கேள்வியினை எதிர்க்கட்சி தலைவரான பில் ஷார்டனிடமே பத்திரிகையாளர்கள் முன்வைத்திருந்தனர். 

“மாற்ற வேண்டும் என்பதற்காக மாற்ற முடியாது” என்ற ஷார்டன், “நாங்கள் தேர்ந்தெடுக்கப்பட்டால், அவர்கள் லிபரல் கட்சி என்பதற்காக, நாங்கள் புதிதாக வந்துள்ளோம் என்பதற்காக லிபரல் கட்சியினர் கொண்டு வந்த அனைத்தையும் கிழித்தெறிய மாட்டோம்” எனக் கூறியிருக்கிறார்.  

ஆஸ்திரேலியாவின் உள்துறை அமைச்சகத்துக்கு நூறாண்டுகளுக்கு முந்தைய அரசியல் வரலாறு இருக்கின்றது. பல்வேறு துறைகளை கையாளும் துறையாக உள்ள இத்துறை பல்வேறு மாற்றங்களையும் கண்டுள்ளது. 1901 முதல் இருந்த இத்துறை 1932யில் கலைக்கப்பட்டது. பின்னர் மீண்டும் 1977 உருவாக்கப்பட்டது, மீண்டும் 1988 யில் கலைக்கப்பட்டது. மீண்டும் 2007 யில் தோன்றி 2013 யில் மறைந்தது. கடைசியாக, ஆஸ்திரேலிய பிரதமர் மால்கம் டர்ன்புல் தலைமையிலான ஆட்சியில் மீண்டும் உருவாக்கப்பட்டது. அப்போது குடிவரவு மற்றும் எல்லைப் பாதுகாப்பு துறையின் அமைச்சராக இருந்த பீட்டர் டட்டன், புதிதாக உருவாக்கப்பட்ட உள்துறை அமைச்சகத்தின் அமைச்சராக பொறுப்பேற்றார். 

கடந்த ஆண்டு புதிதாக உருவாக்கப்பட்ட உள்துறையில், ‘குடிவரவு மற்றும் எல்லைப் பாதுகாப்பு, உள்கட்டமைப்பு மற்றும் பிராந்திய வளர்ச்சி, சமூக சேவைகள்’ உள்ளிட்ட பல துறைகள் சேர்க்கப்பட்டன. 

இத்துடன் தேசியப் பாதுகாப்பு, ஆஸ்திரேலிய காவல்துறை, ஆஸ்திரேலிய எல்லைப்பாதுகாப்பு படை தொடர்பிலான பல அதிகாரங்களும் இத்துறையுடன் இணைக்கப்பட்டன. 

இத்துறையை கலைப்பது பற்றிய விவாதங்கள் லேபர் கட்சியில் எழுந்திருப்பதில் உங்கள் கட்சிக்குள்ளேயே நீங்கள் எதிர்ப்பை எதிர்கொள்ள வேண்டும் என நினைக்கிறீர்கள் என்ற கேள்வியும் பில் ஷார்டனிடம் வைக்கப்பட்டுள்ளது. அதற்கு, “நாங்கள் நிபுணர்களின் அறிவுரையை தான் நம்புவோம். அதன்படியே ஆட்சியை நடத்துவோம். லேபர் கட்சியில் ஒற்றுமையில்லை என கண்டிப்பாக சிலர் சொல்லக்கூடும், ஆனால் அதுகுறித்து நான் கவலைப்பட போவதில்லை” என எதிர்க்கட்சித் தலைவரான பில் ஷார்டன் பதிலளித்திருப்பது, ஆஸ்திரேலிய நாடாளுமன்ற தேர்தல் நெருங்கிவரும் சூழலில் முக்கியத்துவம் வாய்ந்ததாக பார்க்கப்படுகின்றது.