சிறப்பு டிஜிபி ராஜேஷ் தாஸ் மீதான பாலியல் வழக்கு விசாரணை தொடங்கியது!

ஞாயிறு மார்ச் 07, 2021

தமிழக முதல்வரின் பாதுகாப்பு பணியில் ஈடுபட்ட சிறப்பு டிஜிபி மீதான பாலியல் புகார் குறித்து விசாரணை செய்ய தமிழக அரசால் அமைக்கப்பட்ட விசாகா கமிட்டி விசாரணையை துவக்கியுள்ளது.

பெண் எஸ்.பி சிறப்பு டிஜிபி மீது கொடுக்கப்பட்ட பாலியல் புகார் மீது விசாரணை நடத்த கடந்த மாதம் 24-ம் திகதி தமிழக அரசின் விசாகா கமிட்டியை அமைத்தது. கூடுதல் தலைமைச் செயலாளர் ஜெய ஸ்ரீ ரங்கநாதன் தலைமையில் 6 பேர் கொண்ட குழு அமைக்கப்பட்டது. 

இதில் ஐஜி அருண் நீண்ட விடுப்பில் சென்ற காரணத்தினால் அவரை மாற்றி நிர்மல் குமார் ஜோஷி என்ற ஐபிஎஸ் அதிகாரியை குழுவில் நியமித்தனர்.

இதனிடையே சிபிசிஐடி காவல்துறையினரும், இந்த விவகாரத்தில் வழக்குப்பதிவு செய்து விசாரணை நடத்தி வருகின்றனர். இந்நிலையில் விசாகா கமிட்டி பெண் எஸ்.பி கொடுத்த பாலியல் புகார் தொடர்பாக விசாரணையை துவக்கியுள்ளது.

தற்போது முதற்கட்ட விசாரணை நடத்தி வருவதாக தெரிவித்துள்ளனர். குறிப்பாக புகார் அளித்த பெண் எஸ்.பி'யிடம் விசாரணை நடத்தி உள்ளதாகவும் தெரிவித்துள்ளனர். அடுத்த கட்டமாக பெண் எஸ்.பியை புகார் அளிக்க விடாமல் தடுத்த அதிகாரிகளையும் மற்றும் முக்கியமாக குற்றம் சாட்ட சிறப்பு டிஜிபியும் விரிவாக விசாரணை நடத்த திட்டமிட்டுள்ளனர்.

முன்னதாக சிறப்பு டிஜிபி யை பணியிடை நீக்கம் செய்து கைது நடவடிக்கை மேற்கொள்ள வேண்டும் என பெண்கள் அமைப்புகள் உள்ளிட்ட பல்வேறு அமைப்புகள் போராட்டம் நடத்தி வருகின்றனர்.

அதுமட்டுமல்லாது பத்துக்கும் மேற்பட்ட பெண் ஐபிஎஸ் அதிகாரிகள் இந்த வழக்கை சிபிஐ விசாரிக்க வேண்டும் எனவும் அமைப்பினர் சார்பில் கோரிக்கை வைக்கப்பட்டது.