கொரோனா தொற்றை தடுக்க கடைகள் எப்படி செயல்பட வேண்டும்?

திங்கள் ஜூன் 08, 2020

தமிழகத்தில் கடைகள் மற்றும் பல்வேறு நிறுவனங்கள் எப்படி செயல்பட வேண்டும்? என்பதற்காக வகுத்துள்ள செயல்பாட்டு முறைகளை அரசு வெளியிட்டுள்ளது.

தமிழக அரசின் தலைமை செயலாளர் கே.சண்முகம் வெளியிட்ட அரசாணையில் கூறப்பட்டு இருப்பதாவது:-

தமிழகத்தில் கடைகள் மற்றும் பல்வேறு நிறுவனங்கள் இயங்குவதற்காக அரசு வகுத்துள்ள செயல்பாட்டு முறைகள் வருமாறு:-

* கடையின் நுழைவுவாயிலில் சோப்பு, தண்ணீர் அல்லது சானிடைசர் வைக்கப்பட்டு இருக்க வேண்டும். கடைக்கு முன்பு 2 மீட்டர் இடைவெளியில் குறியீட்டு அடையாளம் இடப்பட வேண்டும்.

* கடை உரிமையாளர், தொழிலாளி முககவசம், கையுறை அணிவதோடு, மூக்கு, கண், வாயை தொடுவதை தவிர்க்க வேண்டும். கடைக்குள் ஒரு வாடிக்கையாளர் மட்டுமே அனுமதிக்கப்பட வேண்டும். 4 அல்லது 5 பேர் வெளியே குறிக்கப்பட்ட இடத்தில் காத்திருக்க வேண்டும்.

* காற்றோட்டத்துக்காக ஜன்னல்கள் அனைத்தும் திறந்து வைக்கப்பட வேண்டும். சமூக இடைவெளி, முககவசத்தின் முக்கியத்துவத்தை உணர்த்தும் விளம்பர பலகையை (3-க்கு 3 அடி) கடை முன்பு வைக்க வேண்டும்.

* கைப்பிடிகள், மேஜைகள் போன்ற அடிக்கடி தொடக்கூடிய பகுதிகளை கிருமிநாசினி கொண்டு நாளுக்கு 10 முறை சுத்தம் செய்யப்பட வேண்டும். கடை ஊழியர்களும் விழிப்புணர்வோடு தகுந்த பாதுகாப்புடன் செயல்பட வேண்டும்.

* இருமல், சளி, காய்ச்சல் உள்ள கடை பணியாளர்கள் வீட்டில் இருக்க வேண்டும். மருத்துவரிடம் தங்களை காண்பித்து பரிசோதனை செய்து 7 நாட்கள் தனிமைப்பட வேண்டும்.

* இருமல், சளி, காய்ச்சல் உள்ள வாடிக்கையாளர்களை கடைக்குள் அனுமதிக்க கூடாது. கடைக்குள் நுழையும் முன்பும், வெளியேறும் போதும் அனைவரும் கைகழுவ வேண்டும். முககவசம் இல்லாத வாடிக்கையாளரை பொருள் வாங்க அனுமதிக்கக் கூடாது.

* தேவையில்லாமல் கடையில் எந்த பொருளையும் வாடிக்கையாளர்கள் தொட வேண்டாம். வீட்டுக்குள் நுழைவதற்கு முன்பு கைகளை நன்றாக மீண்டும் கழுவ வேண்டாம்.


இவ்வாறு அதில் கூறப்பட்டுள்ளது.