நான்கு வயது சொந்த மகளை மண்ணெண்ணெய் ஊற்றி எரித்த தந்தை!

புதன் மார்ச் 03, 2021

ஜோதிடத்தை நம்பி, நான்கு வயது சொந்த மகளை மண்ணெண்ணெய் ஊற்றி எரித்த பைத்தியக்காரத் தந்தையின் வெறிச்செயல். 

அரசியலமைப்புச் சட்டத்தின் 51A(h) பிரிவு ஏட்டுச் சுரைக்காயா என தலைவர் கி வீரமணி கேள்வி எழுப்பியுள்ளார்.

திருவாரூர் மாவட்டம் நன்னிலத்திலிருந்து வந்துள்ள ஒரு செய்தி நம் இதயத்தைப் பிழிகிறது. வெட்கமும் வேதனையும் விலா நோகச் செய்கிறது. பகுத்தறிவு பூமியாகிய தமிழ்நாட்டில் இந்த இருபத்தியோராம் நூற்றாண்டில் கூடவா, ஜோதிடத்தை நம்பிய ஒரு தந்தை தன் 4 வயது மகளான இளந்தளிரை மண்ணெண்ணெய் ஊற்றி எரித்துள்ள கோர சம்பவம்? 

தமிழ்நாட்டிற்கும் பகுத்தறிவாளர்களாகிய நம் அனைவருக்குமே தலைகுனிவை ஏற்படுத்தக் கூடியதாக உள்ளது! வன்மையான கண்டனத்திற்குரிய காட்டுமிராண்டித்தனம்.

படிப்பறிவு பெருகியுள்ளது. பகுத்தறிவுப் பிரச்சாரத்தின் வீச்சும் தேவையும் மேலும் பெருகி, அடைமழையாகப் பொழிந்து இந்த மூடநம்பிக்கை நோயால் வறண்ட மூளைகளை வளப்படுத்த நமது பணி மேலும் மேலும் தீவிரப்படுத்தப்பட வேண்டும் என்பதையே இம் மாதிரி அவலச் செய்திகள் அறுதியிட்டு உறுதி கூறுவதாக அமைந்துள்ளன.

நமது அரசியலமைப்புச் சட்டத்தின் 51A(h) பிரிவில் அறிவியல் மனப்பான்மையைப் பரப்புவதும் மூடத் தனத்திற்கு எதிராகவும், கேள்வி கேட்கும் உணர்வை வளர்த்து மனிதநேயத்தைப் பரப்பவேண்டும் என்பதும் இங்கே வெறும் ஏட்டுச் சுரைக்காயாகவே உள்ளது.

தமிழக அரசு காவல்துறை இத்தகைய சம்பவங்களைத் தடுக்க, பகுத்தறிவுப் பிரச்சார அமைப்புகளுக்கு ஆதரவும், ஆக்கமும் ஊக்கமும் தர முன்வரவேண்டும்.

இன்னமும் ஜோதிடம் உயிரைக் குடிக்கும் கொடுமை நீடிப்பதா?

இவ்வாறு தன் அறிக்கையில் கி.வீரமணி குறிப்பிட்டுள்ளார்.