கல்முனை வடக்கு ஆதார வைத்தியசாலை பணிப்பாளர் வைத்தியர் குணசிங்கம் சுகுணன், நாடாளுமன்ற உறுப்பினர் இரா.அருச்சுனா, முன்னாள் இராஜாங்க அமைச்சர் எம்.ஹரீஸ் உட்பட 6 பேருக்கு எதிராக நிகழ்நிலை காப்புச் சட்டத்தின் கீழ் தொடரப்பட்ட வழக்கு இன்று (2) மட்டக்களப்பு நீதவான் நீதிமன்ற நீதவான் அ.தர்ஷினி முன்னிலையில் எடுத்துக்கொள்ளப்பட்டபோது இவ்வழக்கினை எதிர்வரும் 16ஆம் திகதி ஒத்திவைப்பதாக நீதவான் அறிவித்தார். 

கல்முனை வடக்கு ஆதார வைத்தியசாலை பணிப்பாளர் வைத்தியர் குணசிங்கம் சுகுணன் மீது  அவதூறாக முகநூல் மற்றும் சமூக வலைத்தளங்களில் பதிவிட்ட நாடாளுமன்ற உறுப்பினர் அருச்சுனா, முன்னாள் நாடாளுமன்ற உறுப்பினர் ஹபீப் முகமது முகமது ஹரீஸ், மௌலவி முஹமத் மிப்லால், உமர் லெப்பை மப்ரூப், அஹமட் லெப்பை முகமது முத்தார், முகமது இப்ராஹிம் மற்றும் யூடியூப், முகநூல் தளங்களுக்கு எதிராக நிகழ்நிலை காப்புச் சட்டத்தின் கீழ் மட்டக்களப்பு நீதவான் நீதிமன்றத்தில் கடந்த செப்டெம்பர் மாதம் 21ஆம் திகதி திங்கட்கிழமை வழக்கு தாக்கல் செய்தார்.

இதனையடுத்து குறித்த 6 பேரும் வைத்தியர் சுகுணனுக்கு எதிராக முகநூல் மற்றும் சமூக வலைத்தளங்களில் எழுதுவதற்கு கடந்த 28-09-2026 அன்று நீதிமன்றம் தடை விதித்து, எதிராளிகளை நீதிமன்றத்தில் ஆஜராகுமாறு உத்தரவு பிறப்பித்து வழக்கு விசாரணை தொடர்ந்து இடம்பெற்று வந்தது.

இதனையடுத்து குறித்த  வழக்கு விசாரணைக்காக இன்று மட்டக்களப்பு நீதவான் நீதிமன்றத்தில்  எடுக்கப்பட்டபோது அருச்சுனா  உட்பட 6 பேரும் ஆஜராகினர்.

இதன்போது அருச்சுனா சார்பில் சட்டத்தரணி கௌசல்யா மற்றும் முன்னாள் இராஜாங்க அமைச்சர்  எம்.ஹரீஸ் ஹபீப் முகமது முகமது ஹரீஸ், மௌலவி முஹமத் மிப்லால், உமர் லெப்பை மப்ரூப், அஹமட் லெப்பை முகமது முத்தார், முகமது இப்ராஹிம், சிரேஷ்ட சட்டத்தரணி கியாஸ் ஹிஸ்புல்லா தலைமையில் சட்டத்தரணிகள் குழு ஆஜராகினர்.

இதேவேளை இந்த வழக்கு விசாரணையில் சிலர் காரணம் காட்டியிருந்தனர். அருச்சுனா உட்பட சிலர் காரணம் காட்டுவதற்காக கால அவகாசம் கேட்டிருந்தனர். அதேவேளை  5ஆம் எதிராளியான அஹமட் லெப்பை முகமது முத்தார் நீதிமன்ற அழைப்பானை கிடைக்கப் பெறாவிட்டாலும் நீதிமன்றில் ஆஜராகி நிபந்தனைக்கு உட்பட்ட கட்டளைக்கு தாங்கள் செயற்படுவதாகவும் அதற்கமைய இவ்வழக்கிலிருந்து விடுவிக்குமாறு அவரது சட்டத்தரணி சமர்ப்பணம் செய்துள்ளார்.

இதையடுத்து எதிர்வரும் 16ஆம் திகதி இவ்வழக்கை நீதவான் ஒத்திவைத்துள்ளதாக வழக்காளியான வைத்தியர் சுகுணன் சார்பில் கனகலிங்கம் கிசோபனா தெரிவித்தார்.