திருவள்ளூர் மாவட்டம், பொன்னேரி அருகே உள்ள ஏறுசிவன் ஊராட்சியில் நேற்று முன்தினம்மாலை ஆடு மேய்க்கச் சென்ற சிலர், அங்குள்ள மரத்தின் கீழே சுமார் 2 அடி உயரமுள்ள உலோகத்தாலான மகா விஷ்ணு சிலை இருப்பதைப் பார்த்தனர்.
இதுகுறித்து அவர்கள் அளித்த தகவலின் பேரில் வருவாய்த் துறை அதிகாரிகள் விரைந்து சென்று சிலையை மீட்டு பொன்னேரி வட்டாட்சியர் அலுவலகத்துக்கு கொண்டு சென்றனர்.
4 கரங்களுடன் காட்சியளிக்கும் மகா விஷ்ணு சிலையின் ஒருகையில் சுதர்சனச் சக்கரமும், மற்றொரு கையில் சங்கும் இடம் பெற்றுள்ளது. பல நூற்றாண்டு பழமையான பல கோடி ரூபாய் மதிப்பிலான இந்த சிலை, மரத்தின் கீழே வந்தது எப்படி என்ற கேள்வி எழுந்துள்ளது.
இந்நிலையில் சென்னை சிலை கடத்தல் தடுப்புப் பிரிவு துணை காவல் கண்காணிப்பாளர் சம்பத் நேற்று பொன்னேரிவட்டாட்சியர் அலுவலகத்தில்
வைக்கப்பட்டுள்ள மகாவிஷ்ணு சிலையை, வட்டாட்சியர் ஜெய்கர்பிரபு முன்னிலையில், பார்வையிட்டு ஆய்வு செய்தார்.
தொடர்ந்து அவர் தலைமையிலான போலீஸார், சிலை கடத்தல் கும்பலைச் சேர்ந்தவர்கள் ஏதாவது ஒரு கோயிலிலிருந்து சிலையை திருடிவந்து கடத்த திட்டமிட்ட நிலையில், போலீஸாருக்கு பயந்து சிலையை இங்கே வைத்துவிட்டு சென்றனரா என விசாரித்து வருகின்றனர்.
மேலும் அந்த சிலை எந்த உலோகத்தாலானது, எந்த காலகட்டத்தைச் சேர்ந்தது என்பது தொடர்பாக தொல்லியல் துறை ஆய்வுக்கு உட்படுத்த நடவடிக்கை எடுக்கப்பட்டுள்ளது.